Samvo肥叔：愛華頓踢到殘難捉老虎

季初開局走樣嘅愛華頓近期似有起色，獲莊家調高評級，今仗佢哋主場對侯城普遍要讓到一球，略嫌過火。「拖肥糖」人腳唔算充裕，繼上周中踢完歐霸盃，今個周中又要應付英超快車，連續兩星期一周雙賽，球員未必頂得順。「老虎」侯城喺聯賽４連敗處於弱勢，但正正係咁更加唔會輕舉妄動，踢番穩陣波，有力頂住疲兵愛華頓。

（now 624周四凌晨3時45分直播）

愛華頓喺歐霸盃飛到德國，激戰完禾夫斯堡，上仗英超又作客鬥熱刺，結果領先後反輸，明顯腳仔軟。咁又難怪，因為領隊馬天尼斯手上人腳有限，用嚟用去都係同一班正選，球隊又要應付歐洲賽，容易踢到殘。愛華頓兩個星期內打四場波，對佢哋造成沉重負荷，不宜高估。侯城近況都係差，上仗更吞曼聯3蛋，今場應該唔敢再亂來，其實佢哋之前作客都踢得比較保守，為免再遭打擊，應會小心為上，守和當贏。

小心阿仙奴曼城名牌陷阱
另外，修咸頓雖然剛輸畀曼城，但呢班波質素唔錯，作客對傷兵滿營嘅阿仙奴，可全身而退，受讓要得過。新特蘭上場對車路士守得好穩，主場對曼城又會採用悶蛋戰術，曼城讓得多有危機。