卡爾萬 ：雙巴駁火 大廝殺

美斯伊巴謙弗爆！
歐聯F組煞科戰上演「雙巴對決」，巴塞隆拿坐鎮魯營恭候巴黎聖日耳門。巴塞主場出戰歐聯戰績亮麗，PSG為歐洲五大聯賽今季唯一不敗球隊，今場互撼輸贏講唔埋，但首循環即使冇蘇亞雷斯同伊巴謙莫域，兩軍最後都順利合演入球騷，今場有埋兩大鋒霸掛帥攻堅，再開大盤話咁易，1.54倍咪嫌熱！

（有線64及203周四凌晨3:45直播）

論戰績「雙巴」各有各好，巴塞自07至08年球季開始，連續7屆歐聯分組賽首名晉級從未斷纜，加上佢哋近29次主場出戰歐聯取得22勝6和1負嘅佳績，今場為贏波搶首名，照道理勢必搏盡。但另邊廂嘅巴黎聖日耳門都唔輸蝕，連同法冠盃、法甲及歐聯23戰15勝8和，為歐洲五大聯賽中今季唯一未輸過嘅隊伍，又有首循環3:2勇挫巴塞嘅往績支持，今場造訪魯營唔係冇得踢。

巴塞「MSN」鋒線煞食
雖然今場勝負難料，好在兩軍箭頭狀態弗到漏，啱晒揀入球大。巴塞王牌美斯上場西甲鬥愛斯賓奴大演帽子戲法之後，職業生涯突破400球大關，近4次落場3次「戴帽」斬獲9球。至於首循環仲坐緊波監嘅蘇亞雷斯，咪睇佢復出後淨係喺歐聯入過1球，查實佢8次上陣交咗5個助攻，同樣夠煞食，兩人今場夥拍巴西球王尼馬組成「MSN」鋒線，要喺魯營搵食根本冇難度。

伊巴謙拍卡雲尼火力猛
相對巴塞喺首循環有蘇亞雷斯停賽，PSG當時亦有伊巴謙莫域受傷缺陣，但呢名瑞典鋒霸自上月中復出後，呢排終於撻番着副偈，近3場上陣錄得4球進帳，今場喺魯營倒戈舊主肯定自動波去盡，何況烏拉圭箭頭卡雲尼喺今屆歐聯勁醒神，頭5場分組賽攻入5球，進攻火力唔講得笑，趁住巴塞右閘丹尼爾儲夠黃牌坐波監，絕對有本錢撕破對手防線。今場雙方箭頭大鬥法，唔捧入球大點得呀！