笛子波童：施迪夫夠料 KO奧克蘭

於摩洛哥舉行嘅世界冠軍球會盃今晚上演兩場半準決賽，頭場非洲冠軍、來自阿爾及利亞嘅施迪夫應可擊敗表現平平嘅新西蘭代表奧克蘭。尾場墨西哥藍十字對亞洲代表澳洲西悉尼流浪者，彼此實力及踢法均相近，預計戰況會較吃緊，捧細盤啱數。

新西蘭球隊奧克蘭喺資格賽憑互射十二碼淘汰東道主麥靴比體育會，表現其實唔算好，如果唔係對手腳下功夫曳、埋門把握力弱，奧克蘭能否晉級仲係未知數，呢班波冇組織又冇速度，踢法一味高Q大腳轟入對手禁區，咁嘅質素唔使提早執包袱、可以踢多兩場已算超額完成。施迪夫陣中雖然冇咩星級球員，但話晒都係應屆非洲冠軍，有半個主場之利值得睇好，1.48倍主W可放心捧場。（無綫翡翠台周日凌晨零時直播）

藍十字流浪者獻「細」
尾場兩支球隊實力則較接近，來自墨西哥嘅藍十字由2012年倫奧男子足球金牌教練坦拿領軍，隊長托拉度代表國家隊上陣超過140次、踢過三屆世界盃，中場馬哥法比安、艾真度卡斯度、巴里拉亦係國腳級人馬，係爭標奇兵之一。西悉尼流浪者能夠贏得亞冠盃全靠一個「穩」字，門將高域屢有神級演出，兩隊都係擅打穩守突擊，缺乏強攻本錢，預計入球數字會偏低。

（無綫翡翠台周日凌晨3時30分直播）