Combo King：ＡＣ傷兵成籮大災難

今晚以意甲做主打，阿King亦睇中咗AC米蘭主場迎戰薩斯索羅，「紅黑兵團」近期大鬧後衞荒，少帥恩沙基被迫以攻代守，面對有意大利新進國腳前鋒施蒙尼沙薩壓陣嘅薩斯索羅，隨時合演入球騷，大盤有買趁早。

（TVB 301周二晚10時直播）

AC十二月尾喺杜拜同皇馬「拍跳」贏4比2，係威係勢兼穩袋400萬歐元獎金，不過「銀河艦隊」都係玩玩吓唔好太認真；其實少帥恩沙基亦有苦自己知，嗰場波有中堅麥薩斯受傷，以往出親場都佗衰家嘅「災星」邦利拿，近期改任右閘有番起色，點知佢又拉傷左腳肌肉，迪施基利奧、阿爾拉米同阿比迪仲未好番，加上保羅艾美路同尼祖迪莊要坐波監，後防得番沙柏達華倫西亞及阿歷士洛里高可用，新仔阿柏達斯都要頂硬上，認真陰功。

鬥薩斯索羅以攻代守
薩斯索羅亦非善男信女，之前十一場正式比賽，只係輸過一仗咁大把，尤其係已成為意大利國家隊常規軍嘅施蒙尼沙薩，表現日漸成熟，對住出名轉身慢嘅沙柏達華倫西亞同阿歷士洛里高，實搵到着數。少帥恩沙基深明防線點排都甩漏多多，好彩隊長蒙杜利禾歇冬前傷愈復出，令AC中場組織力大為改善，連帶之下令艾沙拉維同文尼斯等前鋒生晒，兩人於擊敗皇馬之役炮製三個士哥，狀態持續上升，隨時擺大個頭同薩斯索羅鬥攻，入球大更好路。

至於西盃十六強首回合馬拉加主場硬撼利雲特，馬拉加中場法維奧費拉拿、後衞維列頓及沙治奧辛捷士未傷愈，利雲特則有主力守將大衞拿華路坐完波監復出，有佢鎮守防線頂得住，受讓值得一試。最後英錦標四強首回合基寧咸主場對布里斯托城，前者近期多失波，主場亦遭逢兩連敗，今次遇上英甲強手布里斯托城，就算有地利主場兼受讓都咪掂，捧番布城客勝。