科娜：拖肥頹爆等畀錘扑

愛華頓喺聖誕新年快車成績最羞家，4戰全敗，仲差過榜尾兩隊李斯特城同般尼，今晚呢班頹兵將喺英足盃第3圈主場迎戰韋斯咸，「拖肥糖」防守問題多多，主場出戰都信唔過，近三作客僅一敗嘅「錘仔幫」受讓值捧。

（now 621、633、660周三凌晨3時45分直播）

近９場輸７場
愛華頓上季失球只有39球，但今季踢咗半季就已經失咗33球，當中差唔多有一半失波係來自防守失誤，數字冠絕歐洲五大聯賽。其實「拖肥糖」上季防守唔算超強，不過強調控球嘅踢法令對手連波都掂唔到，所以失波唔多，但其他球隊經過一季嘅適應期，已經知道點樣破愛華頓呢招，就係屯重兵喺後防，等「拖肥糖」球員插針都插唔入，然後趁佢哋掛住進攻，暴露後防空檔，三兩下手腳KO「拖肥糖」。「錘仔幫」踢法硬淨，曾試過用壓迫踢法搞到愛華頓同市兄弟利物浦冇啖好食，今場絕對可以再嚟一次，「扑」散「拖肥糖」脆弱嘅防線！

愛華頓由去年12月開始狂輸波，9場賽事輸咗7場，喺聯賽跌到13位，近日有傳球會為咗籌錢畀領隊馬天尼斯增兵以防降班，願意以4,500萬鎊賣走陣中王牌巴克里，無論傳聞係真定假，都肯定影響軍心。今場實在搵唔到理由撐「拖肥糖」，一於捧韋斯咸讓球勝！