科娜：韋斯咸搶韁先入波

「拖肥」搏殘慢三拍
近期英格蘭國內賽事密麻麻，完咗聖誕新年快車又嚟足總盃比賽，真係替班球員辛苦！今晚深夜就有場英足盃第3圈重賽賽事，韋斯咸主場再鬥「拖肥」愛華頓，「錘仔幫」連續3場賽事都先開紀錄，對住作客五連敗嘅「拖肥」有「揸拿」，博主隊第一隊入球！

（now 621及632周三凌晨3時45分直播）

愛華頓剛喺周六惡戰完曼城，雖然韋斯咸亦喺同一日鬥史雲斯，不過論激烈程度肯定係「拖肥糖」嗰場激啲，愛華頓大部分時間畀曼城「撳」住嚟砌，只能靠反擊製造機會，雖然最尾都保住不敗，但班球員都搏到殘晒，抖咗兩三日又要再踢，今場作客隨時腳仔軟。

「錘仔」連續三場入首球
相反韋斯咸作客史雲斯憑住安祖卡路爾完半場前嘅世界波先開紀錄，近3場都係先入波嗰隊，雖然佢哋呢場保唔住勝局，但班波都有段時間係Lead住嚟踢，相比下冇愛華頓踢得咁辛苦。「錘仔幫」上場英足盃贏唔到愛華頓認真唔抵，補時階段先被逼和，今場返到主場當然想趁對手未咁快上力，盡早入波KO佢哋，費事留有後患拖到踢加時。愛華頓近5場作客輸晒，其中3場更係冇波入，今場韋斯咸第一隊入球捧得過喎！