卡爾萬：卡路爾腳風順韋斯咸嗒糖

今晚英格蘭足總盃第3圈重賽上演英超對決，由韋斯咸喺烏普頓公園球場迎戰愛華頓。兩軍近期演出都麻麻，連續幾場未贏過，但相比「錘仔幫」連場硬仗，「拖肥糖」接連喺主場贏唔到不特止，作客更係任人魚肉，相信今場難阻韋斯咸贏波晉級，捧2.23倍主勝。（now621及632台周三凌晨3:45直播）

愛華頓死火傷兵多
韋斯咸連續5場不勝，但其中喺聖誕新年快車連鬥車路士同阿仙奴兩支勁旅外，對上兩場更要連續作客出戰，贏唔到都情有可原。佢哋今場返到自己地頭鬥愛華頓，雖然箭頭迪亞法沙高背傷缺陣，安拿華倫西亞又狀態一般，好在英格蘭前鋒安祖卡路爾夠生性，上場英超作客史雲斯先拔頭籌嘅佢，近4次主場出戰亦有3球斬獲，今場有佢落場數胡，火力信得過。

另邊廂，愛華頓第3圈同韋斯咸首次交鋒，雖然強陣出擊兼坐擁地利，弊在踢落佔唔到咩甜頭，若非盧卡古喺補時階段入波扳平，早已被踢出局。「拖肥糖」自去年12月開始，踢11場波淨係贏過曳爆嘅昆士柏，當中5場作客全敗兼勁失11球，伊度奧同盧卡古兩大箭頭更加顆粒無收，加埋門將侯活、迪斯甸、占士麥卡菲等主將受傷唔踢得，今場造訪「錘仔幫」相信難逃被「扑濕」命運。