蘇斯黑柴 ：沙特瓣瓣贏夠o趙北韓

亞洲盃今晚續演兩仗，係實力最接近嘅B組賽事，頭場先演首輪雙雙落敗嘅北韓同沙特阿拉伯交鋒，兩軍今仗背城借一，比較實力、經驗同首輪表現，沙特阿拉伯都勝北韓一籌，小讓平半宜捧上盤。

（now 671周三下午3時直播）

沙特阿拉伯處於新舊交接期，加上王牌球星艾森拉尼因傷缺陣，首仗落筆打三更不敵賽前被睇淡嘅中國隊，不過計表現輸得幾唔抵，大部分時間控制戰局，只係下半場夏沙斯嘅12碼先被中國門將王大雷救出，末段更畀于海嘅罰球一劍封喉，事實上中國全場有威脅攻門唔多。另邊廂北韓亦以一球僅負烏茲別克，但就全場捱打，北韓近年嘅青年軍賽事同亞運表現有飛躍進步，但青訓發展始終較遲，國家隊未見顯著進步，面對烏軍根本得個走字，欠缺組織能力，疲於奔命咁跑令好多個球員都有抽筋現象，遇上沙特睇低一線。

國足怕「克」冇運行
尾場由兩支首仗贏波球隊中國及烏茲別克交手，烏茲別克上輪大雨下小勝北韓，但全場射門達26次，係首輪分組賽16隊中攻門次數最多隊伍，球隊鋒力雖冇早幾年咁勁，但中場控制戰局係最強項，令實力次一皮對手好難偷雞，上仗下半場換入嘅拉舒杜夫具威脅力，今仗預期表現可再進一步；中國首仗贏波有僥倖成分，計實力好唔得過北韓幾多，防線亦頻見漏洞。國足近年喺大賽遇上烏茲別克例冇運行，近3次喺亞洲盃同世界盃外圍賽交鋒，以1和2負處下風，烏茲別克小讓平半都係捧上盤好過。

（now671周三下午5時直播）