蘇斯黑柴：伊朗夠經驗劏阿聯酋

誓爭首名避日本澳洲
亞洲盃最後一輪分組今日輪到Ｃ組，重頭戲係伊朗同阿聯酋爭奪首名資格，雖然兩軍都已經提早出線，但假如只能次名出線，半準決賽就極可能要硬撼勁旅日本；相反首名出線只係對伊拉克或者約旦，而且喺決賽前仲可以避開東道主澳洲，形勢一天一地。伊朗目前得失球差不及阿聯酋，要搶首名非勝不可，黑柴信賴佢哋嘅級數同經驗，撐1.85倍主勝。

（now 671周一下午5時直播）

伊朗係去年巴西世界盃中表現最受讚譽嘅亞洲球隊，當中力拚阿根廷嘅經驗對球隊幫助極大，球隊中後場實力堪稱亞洲最強，尤其一對亞洲最頂級嘅防守中場，曾經喺英超搵食嘅迪蒙尼恩，拍住効力西乙奧沙辛拿嘅尼古納姆，成為防線最有力屏障。

撐埋「小伊朗」巴林
伊朗喺世盃後踢過四仗，熱身賽對過南韓同伊拉克，今屆亞洲盃分組賽對過巴林同卡塔爾，四戰全勝保持零失球，演出唔悅目但最終都贏。何況伊朗向來剋死阿聯酋，自1980年首次交手至今，兩隊共對壘15次，伊朗取得11勝3和1負佳績，若然唔計熱身賽，伊朗大賽對阿聯酋更保持7勝3和不敗，得失球14比1嘅絕對優勢。阿聯酋首仗贏卡塔爾係搶鏡，但上仗只靠對手烏龍波險勝巴林，今仗面對背城借一嘅伊朗唔係話想和就和得到。

同組仲有卡塔爾對巴林，卡塔爾今屆賽事攻守都令人失望，踢法華而不實，連領隊比馬迪都話，呢支年輕球隊目標係2022年主辦世界盃，目前仲需要時間學習；巴林情況相反，喺西亞有「小伊朗」之稱，擅長穩守突擊，過去兩場分組賽都畀到對手極大麻煩，踢法上剋住卡塔爾，仲有得受讓當然博下盤啦！

（now 672周一下午5時直播）