張志德 ：維拉利爾主場孭到菲

「黃色潛艇」維拉利爾近期氣勢如虹，主場嘅戰績更加毫無瑕疵，今晚喺西班牙盃8強首回合，主場對啱啱輸波嘅基達菲，贏波相信冇難度。鬼Sir好有信心維拉利爾今場贏波之外，仲起碼可以贏對手兩球或以上，主W同讓球主勝都係信心之選。

（周四凌晨3時開賽）

維拉利爾近期戰績認真唔錯，已連續15場不敗，當中共贏10場，主場亦錄得5連勝，氣勢認真唔講得笑。維拉利爾過去幾場西班牙盃賽事都係搵杜斯山度士同謝拉特摩蘭奴兩位唔係成日喺聯賽上陣嘅球員負責攻堅，但佢哋質素始終都有番咁上下，今仗就算有後衞祖傑及中場靴蘭佩雷斯續抖，但要喺主場贏波料並非難事。

基達菲陣殘士氣曳
基達菲剛喺主場慘吞皇家馬德里3蛋，球隊表現其實唔錯，但竟然踢出咁樣嘅戰果，肯定好打擊士氣。基達菲現時雖然排喺聯賽第15位，但只領先第18位嘅艾美利亞1分，有乜閃失就會跌入降班漩渦，相信暫時都會係重視聯賽懶理盃賽。

另外，基達菲今仗作客仲有門將古亞達、中場拿菲達及前鋒巴巴迪亞華拉因傷唔踢得，而中場拿辛則暫時離隊代表阿爾及利亞出戰非國盃，陣容天殘地缺加上作戰態度成疑，因此覺得佢哋今場唔會去盡，既然一切優勢都喺晒主隊嗰邊，「黃色潛艇」料可大勝一場。