雷法爾：贏2粒夠晉級 曼聯英總劍指「讓球和」

曼聯今晚喺英格蘭足總盃第4圈（32強）作客劍橋聯，睇牌面雙方實力懸殊，況且紅魔依家得番1個足總盃叫有得爭吓，贏波晉級肯定唔成問題。之但係佢哋要讓2球略嫌過分，不如冷敲3.9倍讓球和仲好。

（now621、633台周六凌晨3:55直播）

域陀華迪斯料擔正
曼聯今季作客從未試過贏對手2球以上，就算佢哋今仗得尹佩斯、艾舒利楊格避戰，但戰意上只求贏波小勝晉級，未必出盡全力大炒對手。英國《天空體育》指門將域陀華迪斯（V.V.）今仗大有機會首次擔正，相信大家都記得迪基亞初嚟埗到嗰陣被高Q大棍足球撞散嘅鏡頭，就算V.V.經驗豐富都未必頂得順呢種「英式招呼」。何況劍橋聯上仗以4:0大勝紐波特郡兼連贏3場，士氣旺盛下有力一拚，未必被紅魔大炒。

英格蘭足總盃賽制；今輪為第4圈階段，法定時間內打和，將擇日重賽。