Mic少：曼城暈機浪米堡頂到半場

英足盃捧盃熱門曼城今輪主場對英冠分子米杜士堡，曼城周中去阿布扎比集訓「過冬」，直至英國時間尋日旁晚6點先至返到曼市，距離今場開波時間僅21小時，球員行色匆匆，隨時未暈完機浪又要比賽，難免影響發揮。米堡狀態不俗，起碼頂到半場唔使輸，博2.65倍半場和。

（now 621及633周六晚11時直播）

中東之旅勁無謂
曼城今次中東之旅，其實好無謂，同漢堡踢1場熱身賽，搞到林柏特受傷，今場好大機會缺陣，加上耶耶托尼離隊踢非國盃，中場人腳實力受削。曼城原定周四返到英國，但領隊比歷連尼好老定，想周五整多課晨操，結果留多1日。問題係球員經過7小時航程，唔夠1日就比賽，令人懷疑佢哋能否恢復體力。唔多唔少反映比帥有所輕敵，切勿太高估曼城優勢。

米杜士堡今季喺英冠表現出色，暫居第二，來季好可能升班，水準拍得住部分英超中下游球隊。米堡最犀利地方係防守，27場聯賽僅失18球，比榜首般尼茅夫少10球，連盃賽近6仗只失1球。米堡應會利用防守強項力求不敗，因為打和重賽就可返主場，屆時勝算較高。以米堡連續6場半場互交白卷走勢，2.65倍半場和好抵玩。