藍軍作客難獲“利”

藍軍作客難獲“利”

前晚場歐冠盃戰果都算令人驚訝，被譽為“地上最強”嘅巴塞竟然畀拜仁“執鑊甘”，慘吞四隻光蛋。巴塞炒人炒得多，估唔到天理循環，今次輸得咁“大煲”，所以話足球比賽經常都有意外賽果，冇話邊隊會贏硬對手。

正如今晚場歐霸盃四強首回合，巴素利對車路士。“車仔”譽為奪標大熱，整體人腳實力明顯比對手較為平均，今仗普遍被睇高一線。但佔有主場之利嘅巴素利能夠過關斬將殺到入四強，始終有一定份量，“車仔”根本冇必勝把握。初盤車路士讓平手／半球，不妨博巴素利有力擋“車”。

冇錯！講球員名氣級數，巴素利的確不及“車仔”一衆球星，但打波最緊要有鬥心、拼勁及團結力量。巴素利在八強兩回合對住熱刺同樣在睇淡下，踢出頑強鬥志，全程力拼到底，今仗在主場球迷力撑下，又點會驚“車”。

“車仔”賽期真係密到不得了，平均三日踢一場，一班“車手”唔殘就假。打完利物浦又再長途跋涉飛瑞士，近六戰作客只得一勝兩和三負成績，“車仔”想贏都辛苦。

推介：和波2:2