雷法爾 ：車仔知醜發奮 打爆紅軍

足總盃出局寸王認羞家
上周末嘅英格蘭足總盃爆到七彩，唔少英超球隊齊齊講Bye Bye，當中以車路士最羞家，佢哋喺主場領先甲組仔巴拉福特2球下反輸4球出局，就連一向寸寸貢嘅莫連奴都認衰仔，話自己都覺得個戰果羞恥！今晚藍戰士轉戰英格蘭聯賽盃4強次回合賽事，梗係要藉住主場之利砌低利物浦，殺入決賽氹番班球迷。唔使諗咁多，一於捧1.47倍主勝。

（TVB301周三凌晨3:45直播）

雖然車路士喺首回合打和1:1場波捱打居多，不過佢哋今次回師主場相信會唔同講法。事關藍戰士今季16次喺史丹福橋球場出擊贏出14次，球隊上場失手輸畀巴拉福特中止主場12連勝，難得咁快今晚有機會畀佢哋補飛呵番粉絲，邊到一眾藍戰士唔搏先？

「迪哥」泰利留力搏今鋪
雖然留力唔係輸波嘅藉口，但射手迪亞高哥斯達、中堅泰利等人上仗休息，今晚抖足回歸點計都秤高一線。賽前夏薩特大讚法比仔同自己勁合拍，話佢哋無論練波定實戰，只要落場就知對方諗乜咁話，再加埋高效射手「迪哥」壓陣，大家等睇佢哋變番做無堅不摧嘅「烈火戰車」啦！

虛火利物浦遇強惡唔出
對手利物浦話就話連續10場不敗，不過睇番手下敗將只係般尼茅夫、般尼、AFC溫布頓之流，遇上同級對手阿仙奴依然惡唔出樣，睇落似係虛火居多。況且佢哋上場鬥保頓接近強陣應戰，體能難免輸蝕，若然再由活力大減嘅謝拉特擔正，仲隨時加重其他球員負擔添。最重要係紅軍今季鋒力疲弱，射手史杜列治雖然跟大隊復操，六、七成機會有正選踢，但始終缺乏比賽狀態好難幫到手，唔通又旨意史達寧再做救世主咩！

首回合：車客和1:1

盤路解碼
車路士今季16次主場出戰贏14次，勝率達87.5%。

Data King：車仔鬥紅軍半場例有士哥
?車路士今季16次主場出擊贏14場，兼有10場零封對手。

?藍戰士連續6次半場攻破紅軍大門。

?雙方近6次喺史丹福橋球場交手開出4口入球細。

乜都玩錦囊：兩隊鬥穩陣踢守「細」波
周末足總盃爆到七彩，睇怕兩軍今場都唔敢輕舉妄動。而且英聯盃賽制獨特，到加時先計作客入球優惠，對利物浦嚟講當然唔使一開波就搶攻啦。至於車路士經過上場失4球嘅教訓，肯定會先做好防守，2倍入球細值得一試。