Mic少：象獅鬥撐喀麥隆

4隊同分鬥心最緊要
非國盃最後一輪分組賽上演「死亡D組」，四隊分數、對賽成績、得失球全部一樣，如果今晚呢兩場再踢成1比1，就要以抽籤定排名，形勢極其緊湊。關鍵時刻最考驗球員心態，名氣最響嘅「大象兵團」科特迪瓦鬥心最低，眾星心繫球會賽事，隨時順水推舟，輸埋提早執包袱。科特迪瓦讓喀麥隆平半，寧願揀喀麥隆下盤。

（周四凌晨2時開賽）

科特迪瓦擁有耶耶托尼、韋菲特邦尼、謝雲奴、沙洛文卡勞、迪奧迪等知名球員，以球隊人腳冇理由對畿內亞、馬里，都贏唔到。歸根究柢都係呢班大牌球星無心戀戰，因為非國盃無論地位及「經濟利益」都比唔上各人所屬歐洲聯賽及球會。講得難聽啲，佢哋根本睇唔起呢項賽事。

科特迪瓦眾星心繫「曼車戰」
近日又有「陰謀論」指如果科特迪瓦分組賽出局，隊長耶耶托尼、射手韋菲特邦尼就可以趕及周六英超大戰，為曼城上陣對車路士，兩人隨時玩嘢「送」科特迪瓦一程。以科特迪瓦低迷表現，「陰謀論」未必無因，加上謝雲奴仲要停賽，伊斯美迪奧文迪上陣成疑、陣容唔完整。科特迪瓦讓波只因名牌效應，不能盡信。喀麥隆雖然近年國際賽成績麻麻，但上年非國盃外圍賽，兩次對科特迪瓦，獲得1勝1和，力壓對手首名出線，「非洲雄獅」受讓好着數。

畿內亞恰慣馬里
同組另一場畿內亞對馬里，畿內亞近年足球水平突飛猛進，世界排名高過馬里10位。畿內亞有多位球員喺法甲搵食，包括有波入嘅里昂前鋒穆罕默德耶泰拿，上仗建功嘅伊巴謙查奧爾効力德甲慕遜加柏，佢哋人氣低，喺球會未受重用，「餓波」耐，返到國家隊特別落力。事實上，畿內亞實力稍高於馬里，雙方近兩次交手，畿內亞都贏波，今仗受讓要得過。

（周四凌晨2時開賽）