黃興桂：心戰舌戰不及場上對戰

點解今日嘅金句會咁講呢？事關喺英超「雙藍會」比賽期間，筆者正在評述緊意甲熱拿亞對費倫天拿吖嘛，所以被迫走寶。言歸正傳，今晚戲肉梗係「淺藍」曼城要作客「深藍」車路士，車仔領隊莫連奴最識玩心理戰，經常於賽前用言語挑釁對方教頭，但撞正曼城主帥比歷連尼唔多鍾意出聲，it takes two to tango（要兩個人先可以跳探戈），睇嚟佢哋要分勝負嘅地方，並非在心戰或舌戰方面，而係於球場上。

「雙藍會」和波居多

依家車仔領先曼城5分，若果後者贏波便可重燃衞冕希望，喺呢場「6分波」嘅爭勝決心毋須懷疑。但莫連奴一向擅打大戰，周中聯賽盃4強次回合加時淘汰利物浦，上半場畀紅軍壓住嚟砌，易邊後果斷地用拉美利斯入替受傷兼踢得曳嘅法比加斯，立即將形勢逆轉，盡顯大師級風範。Peter認為車仔今仗唔會同「藍月亮」鬥攻，睇定嚟食，入球唔會多，和波機會亦好高。

金句：
今晚英超雙藍會，睇唔到係我走寶！