Mic少：赤道畿內亞難以加納

老兵搏殘 球證幫唔到咁多
非國盃今晚上演另一場4強賽事，主辦國赤道畿內亞對加納，赤道畿內亞上仗憑「主場之利」獲球證「幫手」，由輸變贏，冇品之餘，球員亦踢足120分鐘，體力難免輸蝕，球隊已經創出參賽以來最佳成績，有晒交代。加納愈來愈上力，可望輕取對手殺入決賽，簡單要客W。

（周五凌晨3時開賽）

赤道畿內亞上仗8強對突尼西亞到補時獲得12碼追和1比1，仲喺加時贏埋對手晉級，但呢球12碼甚有爭議性，更引起突軍球員圍攻球證，幾乎變成打鬥。主辦國獲球證眷顧並非新鮮事，但今次幫得太出面，自然惹來各界關注，睇怕球證今場唔敢再亂來。若然「公平比賽」，赤道畿內亞勝算肯定打折扣，一來人腳本身唔及加納，二來上仗實在搏得太盡，恐怕未必回到氣，尤其係赤道畿內亞陣中球員年紀都唔細，効力港超聯球隊標準流浪嘅中場主力艾雲已經34歲，頻密賽程下相當蝕底。

加納愈打愈順高一線
加納自首場分組賽輸畀塞內加爾後愈打愈順，已連贏3場，上仗更大炒畿內亞3蛋。陣中除咗有基恩、阿休兄弟等知名猛將外，左翼基斯甸艾素亦值得留意，呢位23歲新星上仗轟入兩球，功架十足，赤道畿內亞好難抵擋得住。事實上，加納今屆已有5位球員取得入球，整體戰出色，點秤都高過對手。