韋根護級最危
英超降班名單留下最後一個懸念！距護級線差五分的韋根“做膽”，拖同積卅七分的紐卡素、阿士東維拉及新特蘭三隻“鐵腳”，季尾肯定唔會死錯人。
隨着雷丁與昆士柏流浪提早“認頭”降班區兩席，十隊只能活一的護級形勢更加激烈。先講高危人士，非韋根莫屬，目前身陷尾三險境，仍不自量力硬闖足總盃決賽，雙線兼顧隨時兩頭唔到岸；近況僅兩和兩負，再失分的話將進一步接近“死亡”。唯一可取之處是死唔斷氣的後勁，近兩季均在末段踢出連勝氣勢，驚險逃過鬼門關，未知今季是否依然吉星高照？最後兩場客戰阿仙奴及主場撼維拉，極度關鍵；但大前提是今周擊敗西布朗，保住護級希望。
維拉黑貓未安全
現積卅二分的韋根少踢一場，尚餘四輪帳面數可取十二分，護級分子齊齊向四十四分目標進發。降班線上，紐卡素、維拉、新特蘭同積卅七分，雖有領先優勢，但並不安全，餘下三輪各有大劫。紐記煞科戰主場硬撼阿仙奴、維拉主場火併車路士、新特蘭作客惡鬥熱刺，滿佈殺機，同時左右前四爭奪。
瞄準同級搶分的諾域治周末主場出擊維拉，奉行一分政策冇蝕底，若全收三分便可衝破四十分大關，更加安枕無憂。再向上數還有修咸頓、史篤城、富咸、韋斯咸及史雲斯未脫險，但基本上已遠離“火頭”，未見太大威脅。
