蘇斯黑柴：科隆無鋒讓唔起漢諾威

山羊羊咩羊年運未到
德甲球隊科隆外號山羊，仲有一個潮爆嘅羊咩鬚教練史杜加，本來嚟到羊年應該輪到佢哋威，不過呢班波近期頭頭碰着黑，今晚喺一向令佢哋頭痕嘅主場萊茵能量球場出擊，面對平均實力高一皮嘅漢諾威，仲要讓平半信唔過，黑柴撐漢諾威下盤。

（有線61及64台周日凌晨1時30分直播）

科隆嘅奧地利教頭史杜加靠防守起家，上季喺德乙守出彩虹，但升到上嚟德甲得一招就唔夠使，到依家踢咗21輪雖然排緊近中游嘅第11位，但實際只領先尾二嘅哈化柏林三分，護級危機嚴重，佢哋近期亦十分運滯，上輪作客慕遜加柏本來守足90分鐘冇失波，可惜踢波有補時呢回事，結果臨完場前失守一分都攞唔到！最慘仲係賽後一班不滿球會嘅極端球迷衝入球場搞事，要出動防暴警察收拾亂局，球會面臨被罰，作客都搞成咁，返到主場呢班球迷就更加放肆，自己人都唔撐自己人，難怪科隆喺主場踢波提唔起勁，今季十次主場比賽只贏過一仗，十場加埋都只係入過四球咋！

漢諾威近況亦好唔得幾多，上仗主場對柏達邦上半場攻極唔入，下半場領先咗又走樣，搞到畀人反勝，不過佢哋平均質素始終較高，而且一直保持唔錯鬥志，少帥泰亞芬哥古達催谷士氣有一手，佢話如果今場輸波就要打護級戰，但點都唔信漢諾威會輸，相信班球員亦會識做，何況今仗有隊長史甸度傷愈復出領軍添！

拜仁要搵柏達邦洩憤
至於早場當然以榜首拜仁慕尼黑作客對柏達邦較矚目（有線61及201台周六晚10時30分直播），拜仁周中歐聯作客遭薩克達悶和，加上沙比阿朗素被逐，頂住條氣返嚟聯賽面對降班膽點都要大勝洩憤，何況國王列貝利將會復任正選，同洛賓雙翼齊飛，讓球主客和讓到兩球都要照捧。