張健峰：皇馬-2唔怕多

艾爾切遇強未威過
皇馬今晚返西甲造訪弱旅艾爾切，C朗喺歐聯鬥史浩克04場波王牌歸位，今場對住遇強隊即腳軟嘅艾爾切似係大炒格，2.3倍嘅「讓客」-2都抵捧。

（now632台及TVB13周一凌晨4:00直播）

皇馬喺上周中歐聯16強首回合作客輕鬆以2:0砌低史浩克，晉級8強呼聲高唱入雲。嗰場波除咗C朗有貨交之外，後防大將比比能夠及時復出，鞏固番條防線亦係致勝關鍵。其實只要C朗有士哥帶得起班波，皇馬又點會放艾爾切在眼內吖，係爭在贏幾多粒啫！

「艦隊」球員 撐安帥留任
《世界體育報》近日報道，皇馬其中一位高層拉馬一直唔太Like安察洛堤，話「銀河艦隊」捧到上屆歐聯完全係靠運，仲提議會方搵番莫連奴回巢喎！不過「肥安」勝在人緣好，以馬些路為首嘅主力都支持佢留任，相信呢班大帝今晚會搏盡攞艾爾切嚟祭旗，用行動撐「老細」。

主隊艾爾切近況雖然係唔錯，不過呢支積分榜下游球隊質素有限，今季對住巴塞、皇馬最少都輸3粒，上個月佢哋3鬥巴塞總共吞咗15隻蛋，隨時到依家都未滯完又試遇強腳軟，今晚主場都應該難逃一劫咯！