阿占：光輝射手知衰全力攻城

澳職爭標熱門珀斯光輝近期頭頭碰着黑，場內場外是非不斷，王牌前鋒安迪基奧治更捲入醉酒鬧事醜聞！不過新一年又係新開始，佢哋今日作客近況麻麻嘅墨爾本城前總算化解內亂，安迪基奧治公開道歉之餘，仲講明會全力幫球隊拎聯賽冠軍嚟回報球迷，今場係時候踢爭氣波，正所謂爛船都有三斤釘，光輝受讓平半，梗係捧1.95倍下盤啦！

（有線64及203周日下午2:00直播）

墨爾本城杜夫傷韌帶
光輝近4場聯賽不勝，季初打落嘅優勢已經化為烏有，最慘係愛爾蘭射手安迪基奧治同後衞祖舒亞列斯頓早前醉酒鬧事被捕，令情況雪上加霜，不過光輝一班高層即刻召開危機會議，兩位主將亦願意道歉，會方同時亦宣布向二人罰款但唔會停賽，意味今場可以披甲上陣。今季射入9球嘅安迪基奧治賽前更發聲明話會承擔責任，仲表明「會全力幫光輝爭取首個聯賽錦標」，睇怕墨爾本城條防線今場波有難啦！

另邊廂嘅墨爾本城近況亦唔見得好好，近2場聯賽只錄得1和1負，對上4仗更加有3戰入唔到波，最慘係愛爾蘭球星杜夫足踝韌帶受傷嚴重，今季可能無機會再上陣，大幅削弱全隊進攻能力，今場就算佔有主場之利都無本錢拎晒3分，試問仲邊有能力讓波呢？

頂占筍盤：
珀斯光輝（下盤）