Yennie：奧脫福惡霸 紅魔大翻新

猛將x粉絲 殺聲震天！
曼聯上星期英超造訪史雲斯，竟然被對手連入兩粒反勝，搞到今季被「天鵝」雙殺，勁失威！痛失3分嘅「紅魔」依家排喺聯賽榜第4位，只係多過第5位嘅修咸頓1分，為咗重返歐聯戰場，嚟緊佢哋每一場比賽都要打醒十二分精神先得！今晚「紅魔」回師奧脫福，係時候重拾霸氣，對住「黑貓」新特蘭有條件大勝一場，撐1.9倍「讓球主勝」！

曼聯上場造訪史雲斯輸波不特止，仲要輸埋人，前鋒尹佩斯腳踝韌帶受重創，要抖成3至4個星期，19歲小將占士威爾遜最近亦喺U21比賽入面受傷，暫時未知抖幾耐，好在「紅魔」勝在板櫈深度厚，鋒線仲有大把選擇，尹佩斯打柴？未驚過囉！

曼聯地頭贏波 最少隊3粒
查實大家都知，尹佩斯今季表現跌晒Watt，反而法卡奧間唔中後備落場仲有驚喜，今晚呢位哥倫比亞射手難得擔正，係時候爭氣踢番場好波喇！除咗「老虎」，奧脫福大佬朗尼近排狀態都唔曳，賽前佢亦走出嚟話要入多兩粒，報答粉絲不離不棄，兩大猛人聯手孭起鋒線，後面又有迪馬利亞、費蘭尼同近兩仗都有士哥嘅安達靴里拉做BackUp，邊使驚冇波入呀?

再講吖，曼聯今季超過大半分數都係靠喺奧脫福搶分，近5次喺主場贏波仲鋪鋪入對手3粒添，咁又係喎，成幾萬粉絲一齊嗌、地頭聲勢勁到嚇死人囉！

新特蘭冇態 近4戰僅入1球
反之，新特蘭狀態勁曳，佢哋喺主場分別賽和西布朗及淨吞昆士柏流浪兩蛋，喺足總盃更加被實力低一大截嘅巴拉福特踢出局，近4戰不勝加埋入得1粒，士氣沉到爆。始終「黑貓」依家喺積分榜排第16位，降班威脅絕對唔細，成班球員壓力大得嚟又冇實力，點搞呀？前鋒迪科爾雖然上仗對西布朗傷愈復出，弊在踢落唔多夠態，今場睇怕都幫唔到手，今晚造訪奧脫福，聽做炮灰啦！

now621台周六晚11:00直播

盤路解碼
曼聯18次主場出擊開14口入球大，大盤率78%。

Data King：黑貓25次鬥魔僅1勝
?曼聯對上6次主場出擊，5次轟入對手3球。

?黑貓對上25次英超鬥紅魔，得1勝6和18負。

?新特蘭係今季唯一一隊喺聯賽45-60分鐘時段冇波入嘅英超球隊。