利雲特“薩”得起

利雲特“薩”得起

西甲今晚有場獨腳戲，由利雲特對薩拉戈薩。利雲特近期表現認真“吔吔烏”，近五戰一和四負，以為攞夠分唔憂降班，就戰意鬆懈，踢到毫無進取心，所謂“針唔拮到肉唔知痛”，餘下四戰零得分的話，隨時玩火自焚，跌落降班漩渦。今晚主場迎戰更需搏命搶分的薩拉戈薩，為求自保已不能再失。

排第十六位的薩拉戈薩與降班線球隊只有一分之差，真係失多一分都唔掂，連埋西班牙盃三戰利雲特取得兩勝一負，心理上只有少少着數，但實力上只係半斤八両，今晚作客仲要讓波認真唔划算，況且首循環兩隊踢到起晒火，出現十黃一紅，利雲特肯定唔會腳下留情，初盤薩拉戈薩讓平手／半球，必捧利雲特有“薩”錯冇放過。

其實利雲特只要攞多三分就可以坐穩船，今仗冇必要送人情畀對手。今季主要靠主場搶分，十六戰贏足一半，比起作客只得四勝兩和輸足十一場嘅薩拉戈薩實際得多。十七場作客只入十四球，薩拉戈薩根本毫冇贏波能力。不過，利雲特亦不遑多讓，可以考慮入球開細。

推介：利雲特1:0