Combo King ：森林好大喜攻砌米堡

周末咁多波難免令人花多眼亂，不過阿King點都會搵到啲好嘢畀讀者，今晚睇中一場英冠賽事，由諾定咸森林主場對榜首嘅米杜士堡，森林自新帥費曼接手後，變得有前冇後、打死罷就，啱啱經歷首敗成肚火，就算對住米堡都照攻可也，入球大乃不二之選。

（周六晚11時開賽）

每個新帥上任初期總會有段蜜月期，費曼亦唔例外，自從於2月頭接手後，費曼一改森林死氣沉沉嘅悶氣，高舉進攻足球旗幟，令眾將嘅精神面貌大為提升，頭6仗取得5勝1和佳績，無論係4比4賽和黑池，定豪贈雷丁同韋根3蛋，場場均開大盤，直至周中快車以1比2不敵查爾頓，令費曼執掌森林後首嘗敗績，但照樣開大，相信其好「大」喜「攻」打法唔會大變。雖然米堡嘅防守能力冠絕英冠，但自2月中足總盃被阿仙奴踢出局後，演出開始唔穩定，之前5仗只獲兩勝，對住中游分子列斯聯同錫周三都輸得，與着晒火嘅森林形成強烈對比，最重要係莊家仍未對森林入得又失得嘅特點作出調整，入球大仲有2倍都咪話唔筍，阿King建議早啲入貨。

不來梅洩氣撐弗賴堡
至於歇冬後強勢反彈嘅雲達不來梅，先喺上輪德甲反輸畀二哥禾夫斯堡3比5，周中再於德國盃被丙組仔比勒費爾德淘汰，接連失利被打窒道氣，今晚聯賽作客力爭搶分護級弗賴堡，平手盤揀番對家好過。最後法甲卡昂主場火併波爾多，前者近7場聯賽6勝1和弗到漏，上場作客馬賽落後兩球都能反勝3比2，攻力唔嘢小，波爾多亦唔會坐以待斃，兩軍隨時合演入球騷，大盤不容錯過。