Yennie ：卡尼證身價 省爆昆士柏

熱刺紅人 爭做土炮射手王
英超今晚有場獨腳戲，由聯賽盃亞軍熱刺作客昆士柏流浪，合演「倫敦打吡」。今場波有英格蘭2大射手正面交鋒，QPR嘅查理柯士甸同熱刺嘅哈利卡尼目前分列射手榜3、4位，可惜昆士柏中後場傷兵滿營，熱刺整體實力又明顯高幾班，Yennie信卡尼仔為咗證明自己先係倫敦射手王，肯定搏命省爆QPR，客勝1.65倍熱就熱啲，但勝在穩陣！

邊個係英格蘭最佳前鋒？唔係朗尼、韋碧克、高治同史杜列治，其實係查理柯士甸同哈利卡尼先真！QPR射手柯士甸今季有15個聯賽入波，係英格蘭土炮「士哥王」，熱刺紅人哈利卡尼就以14球緊隨其後，係咪估佢哋唔到呢？

群星撐起卡尼 熱刺力衝英超前4
論入球能力，2人堅係不相伯仲，不過計全面性，當然係哈利卡尼高啲啦！卡尼仔唔單止識入波，助攻一樣耍家，最重要一點，踢波唔係一個人可以打晒，熱刺有基斯甸艾歷臣、查迪尼同安祖斯唐辛等猛將幫卡尼仔手，反而QPR近2個月6個聯賽入波，就有一半旨意晒查理柯士甸，一旦柯士甸冇態或被盯死，咪搞到隊波冇成績囉！

唔好忘記，喺歐霸盃同聯賽盃慘敗嘅熱刺，依家唔使再一周多賽，班球員可以集中精神同體力喺聯賽戰線，以佢哋嘅班底，應該可以打出好成績，而且熱刺要以前4名為目標，剩低嘅賽事可以話係1分都不能少，今場作客又點會留手呀？

防線天殘地缺 QPR齋靠柯士甸
另邊廂嘅昆士柏流浪，近8場比賽只得1勝，其餘7場輸波又輸盤，表現曳到得人驚！咁又難怪嘅，事關QPR嘅傷兵名單水蛇春咁長，利萊費亞、李察鄧尼及奧奴夏呢3位大將打柴，中場戰將祖爾巴頓仲坐緊波監，成條防線天殘地缺，梗係畀人魚肉啦！今晚昆士柏即使有主場之利都幫唔到幾多，一於捧1.65倍嘅熱刺客勝啦！

盤路解碼
熱刺今季23場作客開出15口入球大，大盤率約65%。

Data King：QPR倫敦打吡未威過
?昆士柏流浪主場連開3口和客。

?QPR近10場倫敦打吡都贏唔到。

?熱刺射手哈利卡尼喺近8場英超作客賽事轟入8球。

?熱刺今季7次輸12碼失守為英超之最。