樂比堅尼 ：辛尼特弗爆「拉」唔住

卡塔爾集訓+歐霸盃熱身
俄超本周重開，連續兩季屈居亞軍嘅辛尼特，今季無論投資同備戰都前所未有咁積極，立志要喺90周年會慶捧盃而回。早前歐霸大勝燕豪芬過關，充分反映球員狀態正值巔峰，主場出戰弱旅烏拉爾料可輕鬆取勝，讓球主客和捧1.55倍「主勝」。

（開賽時間︰周日凌晨0:00）

雖然本周有日職及美職開鑼，但樂比認為可以畀少少時間睇定啲先，唔需要急於投注，反而歇冬後重開嘅俄超有上半季睇辦，風險相對較低。由於俄羅斯冬季天氣寒冷，故歇冬期長達3個月，根據以往經驗，好多球隊長抖之後雪到凍晒，備戰充足嘅球隊，往往可以贏在起跑線。

主場強勁兩場入12粒
以辛尼特為例，球會早於1月已拉隊到卡塔爾集訓，之後再到土耳其同西班牙約戰多支歐洲勁旅，最重要係開咧前有兩場歐霸盃作為熱身，對球員提升狀態有好大幫助。即使歐霸對手係荷甲榜首燕豪芬，辛尼特兩回合計仍輕鬆大勝4:0，可見隊波狀態甚弗。而委內瑞拉射手荷西朗頓，同剛續約至2019年嘅巴西國腳侯克腳風都相當順。

其實樂比一向唔太主張買讓球勝，畢竟聯賽目標只係3分，贏一球同兩球意義分別唔大，入完一球歎慢板你都奈佢唔何。不過辛尼特主場威力強勁，聯賽主場9戰7勝1和，另外季初亦曾創下8連勝佳績，當中頭兩場聯賽更喪入12球，可見佢哋季初狀態往往特別銳利。

烏拉爾莫財靠借將
上季先升上俄超嘅烏拉爾，由於地理位置偏遠，所以作客成績一向唔突出。佢哋最大問題係資金不足，僅以借將及自由轉會球員為骨幹，故一直未解決攻擊力欠佳嘅毛病，今場面對狀態甚勇嘅辛尼特恐怕凶多吉少。

樂比推介
辛尼特（讓球主勝）