黃興桂：隊際運動管理 美英德真頂級

Peter睇咗二、三十年嘅美國隊際運動，包括NBA、棒球及美式足球，並經常留意英超賽事，嚟緊9月又會遠赴德國，去睇當地聯賽甚至歐聯添！其實美、英、德呢3個國家嘅隊際運動都搞得特別出色，原因係本身文化水準高，從而產生健全兼多元化嘅比賽制度，繼而各球隊管理、球場質素等都能做到盡善盡美，亦甚少出現假波同黑哨，因此吸引到更多球迷認為值同願意花錢入場欣賞，環環相扣密不可分，呢種成功之道絕對冇符碌，亦冇得走捷徑，香港球壇真係有排學。

利物浦晉級冇難度
今明共演兩場英格蘭足總盃半準決賽，今晚先有利物浦主場迎戰布力般流浪，雖然足總盃係爆冷溫床，但紅軍近期改踢343陣式後，中場佐敦軒達臣狀態大勇，謝拉特因傷缺陣，反而唔使下下都要經呢位老將發辦，令整體進攻組織更加暢順，相信紅軍贏波晉級冇難度。

至於聽晚重頭戲曼聯主場火併阿仙奴，紅魔主帥尹戈爾教咗大半季，連一個比較穩定嘅正選11人陣容都未搵到，遇上近況唔差嘅阿仙奴，要讓波唔划算，Peter認為阿仙奴起碼可以攞個和波，若果和波的話，就可重賽畀球迷睇多場好波啦！

金句：國家文化經濟及管理，係同隊際運動掛鈎的