Yennie：紅軍勒唔住 追打布力般

足總盃8強開騷！
利物浦雖然喺歐霸盃出局，不過佢哋近排喺英格蘭本土賽連續19場不敗，聯賽更一口氣殺上第5位，同第4位嘅曼聯只係相差2分，氣勢一時無兩，今晚「紅軍」喺英總8強賽，主場迎戰實力低一班嘅英冠仔布力般流浪，實行贏波兼贏盤，強捧1.63倍讓球主勝！

自從「神奇隊長」謝拉特養傷後，「紅軍」狀態同表現反而更Sharp醒，計落佢哋已經連續12場英超不敗，繼早前作客贏修咸頓2:0之後，佢哋跟手又喺主場分別擊敗曼城同般尼，的確弗到勒唔住。取代謝四、戴起「紅軍」隊長臂章領軍嘅佐敦軒達臣，近排腳風仲鬼咁順，佢位「中場拍檔」菲臘比古天奴亦好弗，呢對後上殺手，喺近3仗各自入咗2球，其中對曼城嗰場入嗰2粒仲要係世界波添，證明「紅軍」冇謝拉特，咪一樣咁勁！

咪忘記利物浦仲有位射手史杜列治，呢位王牌前鋒上場重任正選後即刻有貨交，今仗佢再拍住史達寧組成「新SAS」組合攻堅，火力相當可觀！況且「紅軍」喺主場已錄得5連勝，呢鋪要贏多過一球，真係冇乜難度囉！

布力般巨人殺手養傷
另邊廂嘅布力般流浪今季喺英冠表現勁曳，最近佢哋頻頻失分，就算上仗作客錫周三以2:1贏波，都唔適宜對佢哋有太大期望。最重要一點，係喺上一圈對史篤城連中三元嘅巨人殺手祖舒亞京治，早排膝傷後仲未好番，冇咗呢位奇兵幫手，相信都幾難搞。呢次布力般作客英超勁旅利物浦，隨時連蛋都未必破到，一於捧「讓球主客和」嘅主勝啦！

盤路解碼：利物浦近11次主場鬥布力般贏7鋪，勝率64%。

Data King：史獨踢英總特醒
?利物浦喺對上20場足總盃賽事，只得3場保住清白身。

?紅軍射手史杜列治近12次足總盃踢正選，一共攻入10球。

?布力般流浪連續11次作客利物浦未贏過。