樂比堅尼：踢完亞冠頻撲到腳軟 獅吼咬唔入西悉

（日）11 布里斯班獅吼 Vs 西悉尼流浪者
上屆亞冠盃冠軍西悉尼流浪者今季喺澳職成績令人失望，依家淪落至包尾，打入季後賽機會已相當渺茫，不過呢隊波鬥志奇佳，並未有放軟手腳，季中增兵後實力進一步提升，今日對住搭完長途機腳軟嘅布里斯班獅吼，有力保持不敗，作客受讓半一敲得過。

（開賽時間：周日下午2:00）

西悉新兵掂火力升
西悉今季成績咁差，主要原因係季初分心應付亞冠，之後就要踢世冠盃，搞到聯賽踢咗4個月至開齋，不過有睇直播嘅朋友，都會認同呢隊波表現愈來愈好，尤其係早前增兵，羅致咗兩名日本球員高萩洋次郎同田中裕介後，令陣容更加完整，之前處子登場即射入兩粒嘅新兵基林布魯特，表現亦令人眼前一亮。

其實西悉入球能力相當強，近8場都有波入，近3仗更攻入8球之多，如果唔係防線多甩漏，加埋運氣不濟，成績肯定更佳。好彩，今仗後防有主將史柏拉洛域刑滿復出，對穩定防線有一定作用，最重要係獅吼攻擊力唔算特別強，樂比認為西悉今仗可保不敗。

上屆常規賽冠軍獅吼，目前僅排第7，跌Watt程度同西悉不遑多讓，雖然佢哋仍有機會殺入季後賽，但近期卻要分心應付亞冠，獅吼上周中要遠征日本，作客浦和紅鑽，搞到前晚先至返回澳洲，樂比認為對備戰今場波有極大影響。睇番西悉今季只係試過2次輸多過1球以上，受讓半一有半格走盞位，下盤值博率甚高。