西班牙贏波冇「蘭」度

西班牙贏波冇「蘭」度

今晚有多場國際友賽，其中荷蘭對西班牙相信將備受球迷注目。荷蘭喺世界盃後接近冇踢過一場好波，球隊明顯亦處於交接期，相比之下西班牙已有一批新星接班，就算作客似乎都唔會落於下風。（周二5，香港時間周三2:45am開賽）

西班牙喺世界盃後重新出發，雖然外圍賽輸過俾斯洛伐克，友賽亦曾不敵德國及法國，但球隊剛戰擊倒烏克蘭，之前對住盧森堡同白俄羅斯都贏得輕鬆，明顯球隊重建之路算走得幾暢順；事實上，西班牙陣中確有好多高質年輕球員，迪基亞、艾斯高、佐治高基同艾華路莫拉達都已證明能力，加埋辛迪卡索拉、法比加斯、艾比奧爾同祖安巴尼特上仗冇出場，今晚有極佳體能應付比賽，就算佐迪艾巴同埋迪亞高哥斯達已先後退隊，狂牛兵團都仍有充足人手可供調動。

橙衣兵團青黃不接

主隊荷蘭世界盃成績好西班牙好多，但球隊世界盃後表現就急轉直下，有指雲高爾一直幫唔到球隊搵出最佳及最穩定陣容，但費格然就覺得橙衣兵團最大問題係青黃不接；喺世盃兩大主力洛賓同尹佩斯今晚都會缺陣，史奈達幾日前踢足亦未必會落場下，荷蘭今晚勢必以年輕陣容應戰。問題係，無論迪比、盧克迪莊、盧斯安奴拿辛格、連積定係卡拉臣，根本都只係喺荷甲搵食，未出過國攞經驗，同西班牙一班新星比真係差咁啲，所以左計右計之下，西班牙今鋪都有機會報番喺世界盃大敗1:5俾荷蘭之仇，客勝值博。