皇蘇斬“馬”有困難

皇蘇斬“馬”有困難

皇家蘇斯達與華倫西亞爭做“阿四”爭得相當激烈，餘下兩埸搶少一分都唔掂，隨時失掉歐冠呢塊“肥豬肉”，尤其今晚主場迎戰皇家馬德里，誓必擺出全攻形，非三分不取。

皇馬已做硬“老二”，贏輸毫無影響，今仗祇屬例行公事，但始終係西甲豪門，都要為球會顧全大局，“老摩”亦要好頭好尾，就算大家“皇”字頭，相信亦唔會放軟手腳，若打真軍，皇蘇要贏皇馬又談何容易？初盤平手，失落西班牙盃的皇馬應要挽回面子，捧皇馬作客贏波。

皇蘇近七次對住皇馬輸足七場，要硬拼根本唔係對手，計人腳級數明顯班數唔同，今仗祇望借助主埸之利，及球員爭勝慾望的鬥心，希望可拉上補下，與皇馬拉成均勢。但講真一句，球隊攻強於守，如果硬攻對手而忽略防守，分分鐘得不償失，衆所周知皇馬前線火力殺傷力超強。

既然勝負無關痛癢，唔排除老摩會半力出擊。不過，做得皇馬二線兵，本身質素差極有條數，有機會上陣發揮更會交足功課，何況無壓力下自然踢得更放。唔使讓波，揀硬皇馬有蠃冇輸至多和。

推介：皇家馬德里 2：1