捧國足除“烏”

捧國足除“烏”

國家隊今晚在內蒙古與烏茲別克踢場友誼賽，未講呢場波之前又吹吓國足的前塵往事。

多年前曾經有位內地足壇前輩講過一句說話——“國家隊邊個教都死”，呢句說話反映之前國足的確問題多多，無論領導層抑或球隊低級管理（俗稱執波衫），行出街真係“靴”咁大個鼻，其實呢個“造型”已經畀球迷一個唔好印象。○二年國家隊到澳門與葡萄牙國家隊踢友賽，齋講球星款，兩班波真係天淵之別，當年的費高與雷哥斯達對球迷相當親民；相反，國家隊班球員冇當自己係國腳，係當自己“國寶”一樣。

當時國家隊主帥米路天奴域算唔算最成功，又係見仁見智，撞正日韓聯辦，米路不但天時地利人和，連時辰八字都夾埋，就算在世界盃決賽周零分零入球都好，總算係國家隊的最大突破。

講返今晚場友賽，兩隊實力真係相差無幾，過往對陣亦互有勝負。國足今次陣容比較完整，除效力巴甲哥連泰斯的陳志釗缺陣外，其餘都係國內精英，包括中超王者恆大九名主力，講戰鬥力，今期國足值得捧場。初盤中國讓平手／半球，可博國足小勝對手。