阿根廷遇“厄”運

阿根廷遇“厄”運

世界盃南美洲外圍賽明晨上演好戲碼，厄瓜多爾火併阿根廷，講牌面，厄瓜多爾一定唔夠阿根廷有“派頭”，只不過，厄瓜多爾高原主場真係惡到出汁，外圍賽六戰六勝，攻入十三球只失兩球，堪稱南美地頭龍。今場波重點，就係阿根廷近兩次到訪都係輸波收場，即係話，“藍白條”今場波仲驚過對手。

巴西以主辦國身份唔使打外圍賽，令阿根廷在南美區獨大，踢決賽周“坐定粒六”，問題係球隊發揮如何，上仗主場悶和哥倫比亞，球迷柴台聲長達十分鐘，可想而知班球員表現好極有限，連球王美斯亦令“粉絲”大失所望，以目前整體狀態，今仗作客實在難以睇好，初盤冇讓波，當然揀主場窮凶極惡的厄瓜多爾坐和望贏。

厄瓜多爾暫有二十分與哥倫比亞並列二、三位，只要今仗搶足三分，出線形勢大好，爭勝決心無需懷疑；人腳方面，華倫西亞、卡斯度、卡斯迪路及蒙迪路等具一定名氣級數，絕對有力“廷”得起。

阿根廷對哥倫比亞全場只得兩次中目標攻門，最大原因係美斯帶傷上陣無貨交，令球隊火力大減，要贏波實在唔易。

推介：厄瓜多爾1:0