期待夢幻決戰凌晨三點打到天光六點,昨日場洲際盃四強西班牙火併意大利真係殺到天昏地暗,連埋加時激戰一百二十分鐘,仲要用到最殘酷嘅十二碼才能分出勝負,夢幻決賽始終都係巴西大戰西班牙。兩場準決賽一樣咁精彩,巴西險勝烏拉圭同樣驚
期待夢幻決戰
凌晨三點打到天光六點,昨日場洲際盃四強西班牙火併意大利真係殺到天昏地暗,連埋加時激戰一百二十分鐘,仲要用到最殘酷嘅十二碼才能分出勝負,夢幻決賽始終都係巴西大戰西班牙。
兩場準決賽一樣咁精彩,巴西險勝烏拉圭同樣驚濤駭浪,終極一戰肯定鬥得更加激烈燦爛,但肯定兩隊埋牙,踢法與準決賽唔同。巴西與烏拉圭實在太熟識,無可否認,巴西在個人技術、整體踢法及心理上始終食住烏拉圭,最終淘汰對手屬於正路。
西班牙對意大利一戰,夠膽講,意大利除控球能力輸蝕外,其他方面都比較優勝,特別係埋門攻勢較直接。更值得一讚的是戰術,意大利確在賽前作出針對性部署,可惜經過日本與巴西兩場大戰後,體能無疑受到一定影響,踢足百二分鐘最後輸十二碼亦無話可說。
至於決賽,巴西對西班牙相信會係一場全技術之戰。巴西比較着重個人能力,西班牙則以整體組織配合為主,可以話各有所長,最重要係呢場決戰兩隊唔好過於保守,期望合演一場對攻大戰。