曼城重返正“路”

曼城重返正“路”

智利教頭柏歷連尼入“城”後第一場比賽即時失威，○比二不敵南非勁旅超級體育聯隊。其實輸波唔係問題，所謂萬事起頭難嘛！何況只係季前熱身，目的在於試陣及操起球員狀態。但話雖如此，再輸多場的話，就講到面子問題，今晚南非之旅第二場對住南非超級聯賽中下游球隊阿馬祖路，貴為英超亞軍的曼城應該要贏波挽回面子。

南非超級聯賽有十六支球隊，阿馬祖路只係排十二位，即係話實力屬於有限公司，陣中較有名氣球員只有中場的莫森古，曾經兩次入選南非國家隊，仲有踢過香港甲組橫濱FC及屯門的馬高遜，都只係略有所聞，要與曼城粒粒星相比，無論名氣或球技當然唔同級數，輸唔過兩球當“阿馬”贏。

曼城上仗的確以練兵為主，共有廿二個球員輪換上陣，包括祖夏特、拿斯尼、高柏尼、耶耶杜尼、迪施高及巴里等一衆主力，而且反客為主力壓主隊超級體育聯隊，可惜迪施高與高拿洛夫頻頻失機，否則曼城唔使輸波收場。經過一場比賽後，球員應該開始上力及適應，只要認真作戰，發揮出本身水準，有信心可以大炒對手。

推介：曼城4:0