格蘭納達夠料贏伊巴

今日同大家推介一場西甲護級大戰！或者你會問：西甲啱啱先開咧，咁快講護級？阿King真係冇講錯(口架)！呢場ＣＦ格蘭納達主場對伊巴，絕對係一場提前上演嘅護級大戰。

首輪對碰提早護級
ＣＦ格蘭納達上季排17，以較佳對賽成績力壓伊巴，僅僅唔使降班，不過，排第18嘅伊巴就暗中篤第13位嘅艾爾切背脊，爆對方有債務問題，結果西班牙足總判艾爾切降班，伊巴奸計得逞因此有得留低。咁啱得咁蹺ＣＦ格蘭納達同伊巴呢兩支難兄難弟新季首輪就要互撼，睇落大家實力好似好接近，不過睇番組軍情況，ＣＦ格蘭納達明顯進取好多，佢哋今夏喺轉會市場積極增兵，羅致咗烏甸尼斯前鋒尼高拉斯盧比斯、馬體會中場魯賓佩雷斯同艾爾切嘅「帶刀後衞」大衞朗班等，加埋上季隊中首席射手艾亞比留隊，整體戰鬥力增強不少，而且球隊繼續由荷西辛度華爾領軍，荷帥上季5月先至接手格蘭納達，竟能喺最後4場聯賽豪取10分，證明係有料之人，因此阿King對佢投下信心一票，今場捧主勝。

（now 632周二凌晨2時30分直播）

諾高平大起希爾星堡
再講兩場瑞典超，依家瑞典超大約剩番10輪，前列球隊競爭激烈，排緊榜首嘅唔係馬模而係哥登堡，至於近幾季都排喺中游位置嘅諾高平今季表現充滿驚喜，排喺第4，落後哥登堡只係兩分咁大把，今場主場對希爾星堡為搶分唔攻唔得，大盤值捧。

另一場科根堡作客辛斯華爾，科根堡要護級，今季先升上瑞超嘅辛斯華爾戰績反而更好，近4場全勝兼一球不失，個勢咁靚梗係捧辛斯華爾主勝啦！