紅魔斬草除“根”

紅魔斬草除“根”

英超開鑼前第一項錦標社區盾今晚上演，由紅魔曼聯大戰韋根。如果睇往績真係一面倒，近十七次碰頭，曼聯贏足十六場，只有一場不敵對手。上季聯賽兩度對戰，曼聯同樣以四球力克韋根，今戰更係莫耶斯“入魔”後第一個盃賽。為要打響頭炮，今仗必會連“根”拔。

韋根上季又有喜，又有愁，球隊奪得八十一年來第一個大賽錦標足總盃，可惜，難逃降班厄運，今季要跌落英冠比賽，今場即係越級挑戰。由於撞魔如撞邪，打親都沒有好結果，預料今仗亦天意難違。初盤曼聯讓一球／球半，經過多場熱身賽失敗之作後，紅魔係時候魔性大發，實行斬“根”捧盾，為下周英超開鑼一壯聲勢。

曼聯季前熱身賽認真失禮，只係兩勝兩和三負，最慘場場有失球，上仗更在自己“福”地對西維爾失三球，老莫唔扯火就假。不過，大部分主力養精蓄銳，目的係今仗社區盾，只要強陣出戰，絕對可以手刃對手。

韋根雖然降落英冠比賽，但球會依然大肆擴軍，加入唔少名氣球員，包括舒卓拿、宮市亮、軒歷基斯及拉美斯等踢得之人，在英冠應有一番作為，但對住紅魔始終難睇好。

推介：曼聯2：0