曼聯必須入貨

曼聯必須入貨

唔好以為娛樂圈“吹水”新聞吹到天花龍鳳，球圈一樣無“堅”都“吹”，好似曼聯嘅華倫西亞上場波改穿“25”號波衫出賽，即刻被傳媒“吹”“7”號戰衣留返畀C朗，傳到C朗將會“落馬”重返“魔界”，更傳出與皇馬爭熱刺天王G巴利，想像力仲叻過小弟，其實只係華倫西亞自己申請着返“25”號；當然，乜嘢事情都會發生，話唔定C朗會加盟本澳踢甲組亦有可能，但講真一句，C朗現在喺皇馬成個皇太子一樣，天王級待遇，又點會玩返轉頭？G巴利恨上“馬”恨咗好耐，點都唔想留在英超，呢兩單料聽吓算啦。

至於其他轉會消息，朗尼上唔上到“車”，“牙擦蘇”入唔入到“廠”，都會同大家繼續跟進。

講開曼聯，今季仍未有太大動作，之前狂追費比加斯，可惜“費比仔”無意做“魔童”，但曼聯唔添兵，衛冕之路實在難行，據聞莫耶斯開始出手，目標係舊日愛將費蘭尼與拜尼斯，反而呢兩個機會相當高，特別係“爆炸頭”，愛華頓將費蘭尼標價三千萬英鎊，問題只係睇曼聯肯唔肯“跌”。