曼城數兩球啱“素”

勁呀！陶局長，果然做到嘢，為人民服務，令廣大球迷繼續有免費波睇，我代表千千萬萬波友向你致敬。為答謝局長大恩大德，今晚捱眼瞓都要睇埋場英超午夜場，由曼城火倂紐卡素。

睇往績，曼城似乎食硬紐記，上季主場大炒四蛋，戰情一面倒，紐記簡直全無還擊之力，再數返近十次碰頭，紐記真正九死一生，只在○八年主場摸和對手，其餘輸足九場，睇怕今仗亦打定輸數，初盤曼城硬讓球半，捧曼城一樣有“素”圍。

自從柏歷連尼入“城”後，球隊在熱身賽表現只屬一般，其實完全正路，始終都要適應球員踢法，如何配合去執正隊波，經過多場調教，相信曼城好快轉入正軌，因為球員平均質素比較高，而目前最需要改善係防線問題，近三場友賽失八球，的確有失強隊風範，幸好今仗對手紐卡素鋒力有限，曼城應可與同市死敵曼聯一樣，旗開得勝。

紐卡素上季經歷過護級驚險，但今季並無太大動作，只借得法國前鋒利美，反而上季共失六十八球的一條弱不禁風防線，依然原封不動，絕對係球隊最大致命傷。以曼城攻力，贏兩球應該問題不大。

推介：曼城3:1