二隊對決不敵車路士 阿仙奴有恐強症？

阿仙奴又崩潰？繼上周歐聯主場輸俾多蒙特，「兵工廠」喺星期三凌晨英聯盃，與同樣派出副選落場嘅車路士相遇，結果喺全場表現差劣下以0:2落敗出局，賽後領隊雲格自然例牌否認球隊開始出現問題，但無可否認兵工廠已出現「恐強症」徵狀。

兩隊波喺呢場比賽都派出大量副選出場，其中阿仙奴就由法比安斯基、華美倫、宮市亮以及賓特拿等擔大旗；而車路士由於兩日前先鬥完曼城，領隊摩連奴一如賽前所言大幅輪換，艾斯派古達、艾辛、迪布尼、韋利安以及桑馬達等今季不受重用球員都悉數上陣。
然而論副選能力，車路士的確遠喺阿仙奴之上，所以接戰後球隊一直攞到優勢，上半場25分鐘，艾斯派古達更把握主隊後衛贊堅臣頭槌回傳乏力先開紀錄；到換邊後車仔仍然佔得上風，結果桑馬達66分鐘右腳勁射破網，幫車仔贏2:0晉級。
值得一提，車仔教頭摩連奴，以及阿仙奴中場奧斯爾呢兩位上季皇馬成員，今季分別離隊後終於首次重逢，而兩人賽後亦嚟個深情相擁，摩帥更獲贈奧斯爾阿仙奴波衫一件，證明兩人感情確係唔錯。

雲格否認陷入危機
另一方面，依家喺英超排榜首嘅阿仙奴，繼上周歐聯輸俾多蒙特後，再一次喺主場輸俾強隊，難免令人擔心佢哋患咗「恐強症」，再講球隊未來3場會分別對住利物浦、多蒙特同曼聯，如果表現依舊，之前建立嘅優勢隨時一鋪清袋；不過領隊雲格賽後就例牌否認球隊陷入危機，但亦補定飛表示冇咗普多斯基、阿歷士張伯倫以及禾確特呢3名傷兵，對調動影響好大，睇嚟連「教授」本人，都對未來3場波可唔可以全身而退，唔算有太大信心。