荷蘭大把“本”

荷蘭大把“本”

荷蘭在世界盃歐洲區外圍賽戰績彪炳，以九勝一和不敗之身，晉級明年巴西決賽周。更得人驚係十場波共攻入卅四球，平均每場三點四球，火力威猛盡顯世界一線勁旅本色，如果防線冇返咁上下穩固嘅球隊，睇怕亦難以抵擋呢支“橙色兵團”連番轟炸。荷蘭今晚又再上足彈藥，全力指向友賽對手日本，證明球隊攻無不克。

日本近兩場熱身賽分別輸畀歐洲屬二、三線球隊的塞爾維亞與白俄羅斯，表現認真麻麻，以目前狀態實在難以挑戰強勁嘅荷蘭。初盤荷蘭讓一球，捧“橙色兵團”輕鬆殺敵。

荷蘭嘅踢法一向崇尚進攻足球，特別係疊瓦式後排攻擊，經常令對手防不勝防，雖然有超級射手雲佩斯因傷缺陣，但依然極具殺傷力，洛賓、史奈積達、雲達華特及倫斯等，足以令日軍後防兵慌馬亂，要入一兩球應該冇走雞。

日本在亞洲區可以話也文也武，只可惜對住歐洲球隊始終比較輸蝕，特別在身體對抗及體能方面，以荷蘭快速緊迫打法，相信日本會踢得更加吃力，只望加強防守抗衡力，將失球數字減到最低。推介：荷蘭3:0