畢爾包贏波贏盤

畢爾包贏波贏盤

恆大在世冠盃不敵歐洲軍冠拜仁屬意料之事，全場被圍攻至少捱打八十分鐘，冇辦法！確實技不如人，面對世界級勁旅，總算上咗寶貴一課。睇返賽後統計，射門次數廿七比一，中目標與角球九對○，拜仁佔盡優勢，唔係中柱又中楣，恆大唔止三球埋單。但球員嘅戰意亦值得一讚，由開波踢到最後一刻，都保持出作戰心態，亦踢出教練納比部署。雖然輸波，但贏得球迷掌聲，可以話雖敗猶榮，希望在季軍戰能夠有更好發揮，可以更進一步。

今日介紹場西班牙盃，由兩支甲組對陣，畢爾包對切爾達，首回合畢爾包以一球落敗，今仗返到主場必會全力翻盤，畢爾包目前排西甲前四位，只落後巴塞、馬體會及皇馬三大豪門之後，證明球隊具一定實力，尤其主場威力，聯賽六勝一和不敗，強如榜首巴塞亦係手下敗將，今戰對住實力一般嘅切爾達，如無意外可以扭轉敗局。

切爾達暫時排聯賽第十五位，近四場聯賽只得一勝三負，只贏過尾三嘅艾美利亞，球隊狀態一般，正為護級而努力，今仗作客主場惡到出汁嘅畢爾包，睇怕凶多吉少。初盤畢爾包讓一球／球半，捧畢爾包贏波贏盤。推介：畢爾包3:0