紅魔增兵困難重重

紅魔增兵困難重重

早前講過冬季轉會情報，最大動作莫過於車仔，如無意外至少有兩三名新兵加入。至於最多球迷又最受關注者肯定係紅魔鬼曼聯，到底莫帥有何增兵計劃，可以令球隊在新一年重上軌道，繼續保住衛冕爭標之路？

事實上，紅魔今季確需要加強整體戰鬥力，特別在中後場方面，所以莫帥已經表明，有朗尼、雲佩斯、靴南迪斯、香川真司及當紮師兄韋碧克，基本上鋒線經已夠人有突，冬季收購唔會考慮攻擊球員。事實上，曼聯目前最大隱憂在於中後場，攔截力度不足，組織欠缺創造力，防線穩健程度有限，最大原因係球員狀態太過飄忽，尤其兩邊側擊，華倫西亞、楊格及蘭尼等，威脅力明顯不及從前，否則唔使老將傑斯間中客串，中後場加碼事在必行。

不過，莫帥增兵大計似乎唔多順利，心目中人選包括荷蘭國腳史奈積達、愛華頓嘅拜尼斯及多蒙特中場列奧斯等經已拒絕來投，至目前為止只有巴西新星列比路表態想入“魔”。冇辦法，始終莫帥開聲，未必有人聽，費爵爺開口，大把人幫手，呢個就係地位問題。