車仔繼續剪“布”

車仔繼續剪“布”

今季英超的確鬥得精彩激烈，前列分子叮噹馬頭你追我趕，中下游位置形勢大亂，前十打後球隊都要為護級而戰，其中在降班區嘅西布朗更需搏命搶分，奈何今晚主場迎戰新任“一哥”車路士，相信搶分機會渺茫。

上周聯賽阿仙奴與曼城齊齊失分，車仔又大炒“紐記”，“老摩”重返英超後，終於帶領球隊升上榜首，不過只領先一分，當然唔穩陣，食住個勢，車仔今戰必會全力出撃，三分志在必得，初盤車路士硬讓一球，西布朗近況不外如是；相反，藍戰士氣勢如虹，一於追車。

雖然首循環西布朗作客史丹福橋幾乎偷“車”成功，只係補時階段被車仔追和二比二，未能爆出冷門。但今時唔同往日，比賽始終講實力及狀態，何況領隊美爾接手後，球隊打法與戰術運用並未有太大突破，可能是西甲與英超踢法仍有差别。

車路士殺敗曼城之後，一班“車手”比賽信心大增，擊敗“紐記”一戰更表現出強者風範，只要繼續發揮如此水準，呢三分應該“依絲執”。

值得一提，美爾上季執教畢迪斯時曾與“老摩”有過“牙齒印”，雙方爆發口水大戰，今晚又碰頭，“老摩”又點會放過你！

推介：車路士2：0