雷丁下盤李直氣壯

雷丁下盤李直氣壯

英冠星期一晚上演獨腳戲，仍然要為殺入升班附加賽而努力嘅雷丁，將會喺主場迎戰來季肯定可殺上英超嘅李斯特城。呢場波論戰意雷丁贏晒，加埋主場之利都受讓平半，下盤信得過。（周一7，無綫網絡電視302頻道周二3:07am直播）

講起戰況先，寫稿時雷丁排喺第8位，落後第6位白禮頓僅一分但打少一場，換句話講今晚只要攞足3分，就可一舉殺上第6位升班附加賽區域，球員戰意肯定唔使懷疑。
雷丁依家唯一疑問，就係近況其實唔算標青，近10周聯賽只贏過3場咁大把，好彩球隊總算叫做保持到一定攻力，近5場波都有波入，前線無論普格恩耶克、笠臣簡奴以及丹尼爾威廉斯腳風都算順，配合中場利格活復出，人腳尚算完整。此外，雷丁今晚另一依靠就係主場球迷，領隊哥斯比賽前已呼籲球迷要作為球隊第12人，否則面對冠軍球隊李斯特城好難打，相信今晚雷丁主場氣氛肯定唔錯。

李城肯定升班失戰意

不過哥斯比其實又唔使咁擔心，事關對手李斯特城雖然係英冠一哥，但由於已肯定攞到來季殺上英超資格，球員心態上亦有放鬆跡象，呢點睇佢哋上周主場大敗俾白禮頓就足夠證明；再講，李斯特城今晚仲會有主力殺手華迪未必趕得切復出，往績上近4次造訪雷丁亦只得1勝3負劣績，包括上季以1:3大敗而回，所以總結嚟講李斯特城無論戰意、往績都全無優勢可言，今晚仲要讓平半唔值博。