恒大客W大家「勝利」

恒大客W大家「勝利」

亞冠分組賽今日可能產生多支出線隊伍；其中FC廣州（下稱廣州恒大）只要擊敗墨爾本勝利，同時間橫濱水手未能贏波就可出線，需明白勝利本身實力唔及恒大，又有國內季後賽後顧，信恒大作客攞3分。（周二1，now670台周二5:30pm直播）

墨爾本勝利近況認真一般，對上5戰只贏過澳職魚腩威靈頓鳳凰，狀態同季中比明顯有距離，而佢哋喺亞冠主場出戰雖然不敗，但留意面對全北汽車只僅僅打和，首戰恒大時，即使早早領先兩球都被反先4:2，更明白兩隊之間實力有極大差距。
恒大今季由孔卡換上迪亞文迪，經過季初一個適應期，球隊已經重上正軌，對上8戰取得5勝，喺中超穩住榜首位置；而對恒大嚟講，呢一戰有幾個非勝不可理由，先係如今場失分，最後一戰就必須擊敗橫濱至肯定出線，似乎有啲冒險，而領隊兼總監納比啱啱生日，以出線做生日禮物相信老人家都相當滿意，而過去周末穆里奇、迪亞文迪都休息留力今場大戰，更顯示恒大非勝不可決心，睇怕墨爾本勝利都難逃一敗。

水手鬥汽車捧和局

同組橫濱水手對全北汽車，橫濱水手如今場失分等同九成九出局，睇佢哋上仗主場出擊贏墨爾本勝利都費一番工夫，今場對更強嘅全北汽車都冇把握，但基於全北最後一仗會喺主場迎戰墨爾本勝利，韓國球隊作風較穩陣，今場可能守和算數。（周二2，now671台周二6:30pm直播）