日本起“塞”踏征程

日本起“塞”踏征程

日本在出征世界盃前，用勝利告別主場球迷，昨晚在熱身賽憑內田篤人一箭定江山，一比○小勝塞浦路斯。

日本展開世界盃決賽周備戰，主場搵歐洲弱旅塞浦路斯熱身，亦是世界盃前最後一次在主場比賽，教練沙哲朗尼排出強陣出擊，本田圭佑、香川真司、岡崎慎司、柿谷曜一朗、長友佑都等人頻頻向客軍防線施壓，岡崎慎司在三分鐘先失機會炒高，遠藤保仁五分鐘後起腳被擋出；日本攻勢浪接浪，本田圭佑的冷箭又被門將撲出，日本終在完半場前兩分鐘，找到入波機會，藉塞浦路斯後防遲遲未能解圍，內田篤人在混戰中近門射入，亦是全場唯一入球。

日本儘管在下半場繼續主攻，陸續換入後備上陣亦是得勢不得分，最終小勝一比○，用勝利壯行。日本將啟程前往美國繼續備戰，下月二日友賽哥斯達黎加，六日再戰贊比亞作最後熱身。