狂牛撞“蘭”

狂牛撞“蘭”

好波一場接一場，明晨繼續有超強戲碼，西班牙激鬥荷蘭，衛冕嘅紅牛雖然人強馬壯，但又非十全十美，講緊嘅係前線火力，四位攻擊手都有不足之處，卅三歲嘅大衛維拉已經失去衝刺力，托里斯始終難復當年勇，柏度氣候未成，欠缺頂級射手風範，迪亞高哥斯達仍受傷患影響，能否發揮出最佳狀態都成問題，就算中場線技術全面，創造力十足，但關鍵就係埋門一腳，如果冇入波本錢，點強都冇用。

上場熱身賽對住低兩班嘅薩爾瓦多，全場廿三次攻門九中目標，可惜只得兩球進賬，今仗對住“橙衣兵團”，攻力將成為勝負最重要因素。

好老實講句，計前線火力，荷蘭有雲佩斯與洛賓兩大世界級射手，個人認為殺傷力會在西班牙之上，史奈積達、迪莊及迪古斯文亦可攻可守。唯一擔心只係欠缺大賽經驗嘅防線，不過勝在年輕力壯，活力搭夠。

荷蘭統帥雲戈爾一向以進攻足球為主，就算今戰對陣西班牙，相信仍會鬥攻鬥搶，互相攻擊形勢下，反而睇好火力較強嘅荷蘭，何況初盤西班牙要讓半球，一於捧“橙衣兵團”埋“牙”。

推介：和波1：1