葡兵難讓美軍

葡兵難讓美軍

足球比賽真係千變萬化，未到“吹雞”完場都未知勝負誰屬，只要愛拼就會贏。

身處死亡D組嘅哥斯達黎加，同組有意大利、英格蘭及烏拉圭，試問有邊個會估到呢支中北美洲球隊會率先出線，而一向認叻到不得了嘅英格蘭要最先執包袱，“意”“烏”最後一場仲要打餐死，又係嗰句“波係圓嘅”。哥斯達黎加憑住無比戰意及鬥心，確實值得殺入十六強。照形勢睇，十六強對手將會係C組次名球隊。既然烏拉圭與意大利都可以“砌低”，“哥隊”更大有機會衝擊八強，打得咁好，希望繼續努力，加油！

明早又有生死戰，美國火併葡萄牙。之前講過陰謀論，德國與美國最後一戰隨時有“默契波”出現，美國在形勢上的確佔優，但求人不如求己，正正式式KO對手更可證明自己實力。就算博和，出線仍大有機會，對住陣容不整嘅葡萄牙，絕對輸唔晒。

單靠“C朗”保至尊嘅葡萄牙今戰背城借一，可惜首戰德國，“C朗”明顯孤立無援，根本踢唔出強隊本色。葡軍人腳已非突出，今仗更有柏比停賽，哥恩達奧及艾美達因傷缺陣，實力更加削弱。初盤葡萄牙讓半球／一球，捧美軍更可殺敗葡兵。

推介:美國一比〇