德國八強惡鬥法國

德國八強惡鬥法國 
 
德國贏得險？換個角度睇阿爾及利亞輸得唔抵就真！世界盃16強賽事，賽前全世界一致睇好德國可贏波晉級，不過阿爾及利亞卻放開包袱，全場以體能不斷壓迫，90分鐘內竟打成0:0，加時德國稍有運氣下，由舒賀爾尼及奧斯爾入波贏2:1，8強將撞上法國。

呢個對碰又令人回想到1982年，當時阿爾及利亞喺分組賽贏德國（西德），最後德國同奧地利打默契波贏1:0雙雙晉級，而被屈死嘅阿爾及利亞自此未能晉身淘汰賽；到今次阿爾及利亞歷史性殺入16強，卻即時遇上德國，似乎都有啲復仇心態。

施利文尼上半場食詐胡

可能連德國教頭勒夫都未有諗過阿爾及利亞咁大膽，一開波阿爾及利亞就不停打前場小組性壓迫，只見技術再好嘅德國球員都「猜」唔到太多腳，而阿爾及利亞中場創甩對方腳下球後頻頻打快速反擊，如非德國門將紐亞機警，全場不斷化作清道夫喺禁區外解圍，阿爾及利亞今場已至少有4個明顯單刀機會，而上半場阿爾及利亞有施利文尼食詐胡下，半場雙方只能踢成0:0。
呢場波阿爾及利亞除咗戰術應用得宜之外，另一值得敬佩嘅肯定係佢哋體能，換邊後阿爾及利亞球員未有放慢腳步，繼續上半場打法壓迫德國球員，雖然德國加強集中力後已有唔少攻勢，但阿爾及利亞門將森馬莫治連番救出梅拿等攻門，而梅拿更有好笑一幕，完場前處理罰球時跣低，亦注定90分鐘內德國未能解決阿爾及利亞要進入加時。
加時開波只係兩分鐘，德國舒賀爾尼就入楔後腳射成1:0，其後雙方陸續有球員抽筋，德國喺加時下半場乘對方空群而出由奧斯爾再下一城，雖然阿爾及利亞打不死嘅鬥志迅速由迪查保追番粒，但仍然以1:2不敵德國16強出局。

阿爾及利亞贏盡掌聲

賽後阿爾及利亞球員都未有太悲傷，畢竟面對德國輸波預咗，但能將德國迫上絕境已係始料不及，後衛保基拉就表示，佢哋差啲就做到一啲不可能發生嘅事；勒夫就話完全唔滿意上半場球隊演出，尤其點名一對中堅頻頻被對方長傳撕破，甚至連入波嘅舒賀爾尼都話，入波都只係有運，阿爾及利亞的確發揮出色，似乎呢場波贏波嘅係德國，阿爾及利亞就贏盡球迷心。